اثار دكتور محمد حميده خبير زراعة النباتات الطبية والعطرية قضية ازمة تقلبات الاسعار وتأثيرها على زراعة وتصدير وتصنيع الزيوت الطبية والعطرية والمنتجات الجاف.. ونشر رأيه عبر الجروبات ذات الصلة، واثار تفاعل ايجابى كبير .
وقال فى تدوينته "الفلاح مظلوم… والمستثمر مظلوم… والمصدر كمان لازم يراجع حساباته!"
خلينا نتكلم بصراحة شوية…
اللي بيحصل في سوق النباتات الطبية والعطرية محتاج وقفة حقيقية من كل أطراف المنظومة. مش منطقي إننا نفضل نتوسع في الزراعة، ونزرع مساحات أكبر، وبعدها وقت الحصاد نلاقي تكدس في الإنتاج والأسعار بتنزل بشكل يضغط على المزارع، وفي نفس الوقت المستثمر اللي حط ملايين في الأرض والري والزراعة والتجفيف والتصنيع يواجه حالة من عدم الاستقرار.
المشكلة مش في الفلاح لوحده، ومش في المصدر لوحده، ومش في المستثمر. المشكلة في إننا أحيانًا بننتج الأول وبعدين نسأل: هنبيع فين؟
لازم نغير طريقة التفكير. قبل ما المزارع يزرع، لازم تكون عنده رؤية واضحة: مين هيشتري؟ الكمية المطلوبة كام؟ المواصفات والجودة إيه؟ وإمتى التسليم؟
وفي المقابل، المصدر لازم يبقى شريك حقيقي في بناء المنظومة، مش مجرد مشتري يبحث دائمًا عن أقل سعر لأن كسر سعر المنتج النهارده ممكن يحقق مكسب في صفقة، لكن على المدى الطويل لو المزارع خسر وقلل زراعته، والمستثمر وقف توسعه، هنلاقي نفسنا كلنا أمام مشكلة أكبر: خامة أقل، وجودة أقل، وأسعار أكثر اضطرابًا.
ببساطة… لما تضغط على الحلقة الأضعف، أنت بتضعف السلسلة كلها.
إحنا محتاجين نقعد كلنا على ترابيزة واحدة: مزارعين، مستثمرين، مصدرين، مصانع، جهات بحثية والجهات المسؤولة عن القطاع، ونتكلم بلغة الأرقام. نعرف حجم المساحات، والإنتاج المتوقع، واحتياجات السوق، والطلب التصديري الحقيقي، ونخطط للمحاصيل قبل الزراعة، مش بعد الحصاد.
وكمان لازم نتحرك بشكل أكبر من تصدير الخام إلى التجفيف والتصنيع والتنقية والفرز والتعبئة وإنتاج الزيوت والمستخلصات والمنتجات ذات القيمة المضافة.
وأنا مش ضد المصدرين، بالعكس، المصدر شريك أساسي في نجاح القطاع. لكن المطلوب إننا ننتقل من فكرة "أشتري أرخص خامة" إلى فكرة "أبني سلسلة توريد مستقرة تحقق مصلحة الجميع."
لأن المزارع لو خسر باستمرار هيقلل المساحة، والمستثمر لو خسر هيوقف التوسع، والمصدر لو فقد الخامة الجيدة هيواجه مشكلة في التصدير.
وفي النهاية… كلنا هنخسر.
النباتات الطبية والعطرية مش مجرد محصول بيتزرع ويتباع، دي صناعة كاملة وسلسلة قيمة تبدأ من الأرض وتنتهي عند المستهلك في السوق العالمي.
وعشان القطاع يكبر ويستمر، لازم نشتغل على بناء السوق، مش مجرد تصريف المحصول.
خلونا نختلف في الأسعار، لكن ما نختلفش على مصلحة القطاع.
الزراعة من غير سوق مخاطرة… والتصدير من غير إنتاج مستقر مخاطرة… والاستثمار من غير منظومة واضحة مخاطرة.
لكن لما المزارع والمستثمر والمصدر والمصنع يشتغلوا مع بعض، ساعتها نقدر فعلًا نبني صناعة مصرية قوية ومستدامة للنباتات الطبيةوالعطرية.
تحياتى للجميع.. دكتور محمد حميده